កំពង់ចាម : អ្នកជំងឺកូវីដ-១៩ ចំនួន៣០នាក់ត្រូវបានជាសះស្បើយ ខណៈមិនមានករណីឆ្លងថ្មីក្នុងថ្ងៃទី១៤ ខែឧសភា ឆ្នាំ២០២១នេះទេ។ នេះបើយោងតាមសេចក្តីប្រកាសព័ត៌មានរបស់រដ្ឋបាលខេត្តកំពង់ចាម នៅថ្ងៃសៅរ៍ទី១៥ ខែឧសភា ឆ្នាំ២០២១។

រដ្ឋបាលខេត្តកំពង់ចាមបានបញ្ជាក់ថាកាលពីថ្ងៃទី១៤ ខែឧសភា ឆ្នាំ២០២១ រដ្ឋបាលខេត្តបានចាត់មន្ទីរសុខាភិបាលយកសំណាកលើអ្នកសង្ស័យចំនួន១៦៨នាក់ ជាលទ្ធផលគឺអវិជ្ជមានកូវីដ-១៩។

ជាមួយគ្នានេះ អ្នកជំងឺដែលកំពុងសម្រាកព្យាបាលជំងឺកូវីដ-១៩ ចំនួន៣០នាក់នៅមន្ទីរពេទ្យមេគង្គកំពង់ចាមក៏ទទួលបានលទ្ធផលបញ្ជាក់អវិជ្ជមានពីវិទ្យាស្ថានសុខភាពសាធារណៈផងដែរ។

អ្នកជំងឺទាំង៣០នាក់នោះរស់នៅស្រុកកងមាសចំនួន១៣នាក់, ស្រុកកំពង់សៀមចំនួន០២នាក់, ស្រុកបាធាយចំនួន០៤នាក់, ស្រុកស្រីសន្ធរចំនួន០៧នាក់ និងស្រុកចំការលើចំនួន០៤នាក់ បានព្យាបាលជាសះស្បើយជំងឺកូវីដ-១៩ ដោយទទួលបានលទ្ធផលបញ្ជាក់អវិជ្ជមានកូវីដ-១៩ ទាំង ០២លើក និងត្រូវបានអនុញ្ញាតឱ្យចេញពីមន្ទីរពេទ្យមេគង្គកំពង់ចាម ត្រឡប់ទៅគេហដ្ឋានរៀងៗខ្លួន និងបន្តធ្វើចត្តាឡីស័កនៅតាមផ្ទះរៀងៗខ្លួនរយៈពេល ១៤ថ្ងៃ ដើម្បីតាមដានសុខភាពបន្ត៕